ရှမ်းပြည်နယ်နေ့(သို့) ရှမ်းအမျိုးသားနေ့

ရှမ်းပြည်နယ်နေ့(သို့) ရှမ်းအမျိုးသားနေ့ ဘယ်တုန်းက ပေါ်ပေါက်ခဲ့သလဲ။။
ရှမ်းပြည်လူထုခေါင်းဆောင်များနဲ့ စော်ဘွားများဦးဆောင်ကာ ရှမ်းပြည်အလယ်ပိုင်း ယခင်လဲချားနယ် ပင်လုံမြို့မှာ ပင်လုံညီလာခံကို ၁၉၄၇ ဖေဖော်ဝါရီလ ၃ ရက်နေ့မှ ၁၂ ရက်နေ့အထိ ၁၀ ရက်ကြာ ကျင်းပခဲ့ပါတယ်။ ဒီပင်လုံညီလာခံ၏ ဆုံးဖြတ်ချက်အရ ဖေဖော်ဝါရီလ (၇) ရက်ကို ရှမ်းပြည်နယ်နေ့ (သို့) ရှမ်းအမျိုးသားနေ့ ဟုသတ်မှတ်ပြီး ဖေဖော်ဝါရီလ ( ၁၂) ရက်ကို ပြည်ထောင်စုနေ့ (၀ါ) ပင်လုံစာချုပ်နေ့ အဖြစ်သတ်မှတ်ခဲ့သောကြောင့် ဒီနေ့ရက်တွေဟာ ကမ္ဘာ့သမိုင်းမှာရော မြန်မာ့သမိုင်းမှာပါ ကမ္ဘာကျော်သမိုင်းဝင်နေ့ဖြစ်ပါတယ်။

ယင်းညီလာခံမှ ချမှတ်ချက်များဟာ ဘာတွေလဲ။

ပင်လုံစာချုပ်မထိုးခင် တစ်ရက်အလို ၁၁-၂-၁၉၄၇ နေ့မှာ ရှမ်းပြည်ကောင်စီဥက္ကဌ စ၀်ခွန်ပန်းစိန်က ရှမ်းပြည်လူမျိုးပေါင်းစုံနဲ့ပတ်သက်အကြုံးဝင်တဲ့ အောက်ပါဆုံးဖြတ်ချက် ၃ ရပ်ကိုချမှတ်ခဲ့ပါတယ်။

(၁) ဖေဖော်ဝါရီ ၇ ရက်နေ့ကို ရှမ်းပြည်အမျိုးသားနေ့အဖြစ်၊
(၂) ၀ါစိမ်းနီနဲ့အဖြူရောင်လ၀န်းအလံကို ရှမ်းပြည်အလံတော်အဖြစ်၊
(၃) ခေးတိုင်းခေးရာဇာသီချင်းကို ယာယီအမျိုးသားသီချင်းအဖြစ်
သတ်မှတ်ကြောင်းထုတ်ပြန်ကြေငြာလိုက်ပါတယ်။

၁၉၄၇ ခုနှစ် မြန်မာပြည်လွပ်လပ်ရေးရခါနီးတစ်နှစ်အလိုကစပြီး ဖေဖော်ဝါရီ ၇ ရက်နေ့ကို ရှမ်းအမျိုးသားနေ့လို့ အစွဲပြုခေါ်ဝေါ်ခဲ့တာ ယနေ့တိုင်အောင်ပါပဲ။
ဒီနေ့ရဲ့အနှစ်သာရနဲ့ဦးတည်ချက်တွေဟာ ရှမ်းပြည်သူတစ်ရပ်လုံး
( ရှမ်းပြည်တွင်နေထိုင်တဲ့လူမျိုးများအားလုံးဖြစ်တဲ့ ရှမ်း၊ ပအိုဝ့်၊ ဓနု၊ လားဟူ၊ ပလောင် စသဖြင့်...) အတွက် ကိုယ်စားပြုတဲ့ နေ့ထူးနေ့မြတ်ပဲဖြစ်ပါတယ်။

သမိုင်းအစစ်အမှန်ကို ပြန်ပြောင်းကြည့်မည်ဆိုရင် ရှမ်းပြည်နယ်နေ့ မရှိရင် အများနှင့်ကမ္ဘာကသိတဲ့ ပြည်ထောင်စုနေ့(သို့) ပင်လုံစာချုပ်နေ့ လဲရှိလာမှာ မဟုတ်သလို လွတ်လပ်ရေးနေ့ (၁၉၄၈ ခုနှစ် ဇန်န၀ါရီလ ၄ ရက်) လဲ ရှိလာမှာမဟုတ်ပါဘူး။
ဒါကြောင့် မြန်မာပြည်လွပ်လပ်ရေးက ပင်လုံမှစ ဆိုသလို ဒီနေ့မြတ်နေ့ထူးတွေဟာ အားလုံးအတွက် အမှတ်ရထိုက်တဲ့ နေ့တစ်နေ့ဖြစ်ကြောင်း မျှဝေပေးလိုက်ပါတယ်။